ഇതൊഴിവാക്കി പ്രധാന ഉള്ളടക്കത്തിലേക്ക് പോവുക

പ്രകൃതിയുടെ ഹൃദയത്തുടിപ്പുകൾ

 

കാലചക്രം ശിശിരത്തിന്റെ കണക്കുകൾ തീർത്തു മടങ്ങിപ്പോകുന്നതുപോലെ, മഞ്ഞുകാലത്തെ ഓടിച്ചകറ്റി വസന്തം ഒരു കൊച്ചു കുസൃതിയോടെ എത്തി. മഴ വൃക്ഷങ്ങളെ കുളിരണിയിച്ച് ഇലകൾക്കും പൂക്കൾക്കും സ്വാഗതമരുളി. വൃക്ഷം മുഴുവൻ പൂക്കളാൽ നിറഞ്ഞു അവയെ കണ്ടപ്പോൾ എന്റെ മനസ്സും കുളിർന്നു.

പൂക്കളിലെ മധു നീണ്ട കൊക്കുകളമർത്തി നുകരാനും അവയോടു പരിഭവം പറയാനുമായി, മരപ്പൊത്തുകളിൽ അവിടവിടെയായി ഒളിച്ചിരുന്ന ഓലവാലൻ കിളികളും സ്നേഹക്കിളികളും തുത്തുക്കുൽക്കി കിളികളും പരദേശിക്കിളികളും ഉന്മേഷത്തോടെ പറന്നുവന്നു. അവ ഓരോന്നും മരക്കൊമ്പുകളിൽ തങ്ങളുടെ ഇടം കണ്ടെത്തി, പൂക്കളുടെയും ഇലകളുടെയും ഇടയിൽ തിരക്കോടെ സഞ്ചരിച്ചു.

അവരോടു കിന്നാരം പറഞ്ഞുകൊണ്ട് ഒന്ന് പുറത്തിറങ്ങാനും ആ കുഞ്ഞുവെയിൽ നാളം ഏറ്റുവാങ്ങാനും എനിക്കും തിടുക്കമാകും. ഞാൻ എന്നും എന്റെ കിടപ്പുമുറിയോടു ചേർന്നുള്ള ജനലിലൂടെ പുറത്തേക്കു നോക്കും. എന്റെ വീടിനോടു തൊട്ടടുത്തായി ഒരു വലിയ വടവൃക്ഷം നിൽക്കുന്നുണ്ട്; വളഞ്ഞുപുളഞ്ഞു നീളുന്ന ശിഖരങ്ങളുള്ള ഒരു വടവൃക്ഷം. അവൾ എന്റെ കൂട്ടുകാരിയാണ്. അവളോട് ഞാൻ എന്റെ കഥകൾ പങ്കുവെക്കാറുണ്ട്. ചിലപ്പോഴൊക്കെ എല്ലാം മനസ്സിലാക്കിയെന്ന മട്ടിൽ അവൾ തലയാട്ടി ഒരു മർമരം പുറപ്പെടുവിക്കും. മിക്ക വൈകുന്നേരങ്ങളിലും ഞാനവളുടെ അതിഥിയാണ്. അവളുടെ തണലിൽ ഏറെ നേരം ഇരുന്ന്, മന്ദംമന്ദമായി ഒഴുകിയെത്തുന്ന ഇളംകാറ്റിനൊപ്പം ഞാനും കണ്ണുകളടയ്ക്കും.

ഞങ്ങളുടെ സാന്നിധ്യത്തിൽ ആ ചില്ലകളിൽ കൂടുകൂട്ടി കുറുകിക്കൊണ്ടിരിക്കുന്ന പലതരം വർണപ്പക്ഷികളുണ്ട്. ചാരനിറം കലർന്ന തൂവലുകളിൽ ‘റ’ എന്ന അക്ഷരം ആലേഖനം ചെയ്ത മഞ്ഞക്കിളികളും അവയിൽപ്പെടുന്നു. ഒരു ചില്ലയിൽനിന്ന് മറ്റൊന്നിലേക്കു ചിറകുവിടർത്തി പറന്നെത്തുന്ന അവ വീണ്ടും ഇണക്കിളിയെ ചേർത്തിരുത്തി കൊക്കുരുമ്മി കിന്നാരം പറഞ്ഞശേഷം ദൂരേക്കു പറന്നുപോകും. എത്ര സുന്ദരികളായ കിളികളാണവ!

വസന്തകാലം ഞങ്ങൾക്കുവേണ്ടി മാത്രമാണെന്ന് ഞാൻ മനസ്സിൽ കരുതും. എന്നും നേരം പുലരാൻ കാത്തിരിക്കുന്ന എനിക്ക്, കിഴക്കുനിന്ന് തേൻതെറിച്ചുവീഴുന്നതുപോലെ എത്തുന്ന സൂര്യരശ്മികളുടെ നേർത്ത കിരണങ്ങൾ ഉറക്കത്തിൽനിന്ന് പൂർണമായി ഉണരാൻ അനുവാദം നൽകും. സ്നേഹക്കിളികളും എന്നെ കാത്തിരിക്കുന്നുണ്ടാവുമെന്ന് എനിക്കറിയാം.

ആ സ്നേഹക്കിളികളുടെ ഇരിപ്പിടത്തിനു ചുവട്ടിലാണ് ഞാൻ ഒരുക്കുന്ന ചെറിയ പുതിയ പൂന്തോട്ടം. ഞാൻ മണ്ണൊരുക്കുമ്പോൾ കൊത്തിപ്പെറുക്കാനായി പരദേശികളായ ചില മഞ്ഞക്കിളികളും എന്റെ സ്നേഹക്കിളികളും കൂട്ടിനുണ്ടാകും. ഞാൻ കൊത്തി ഇളക്കുന്ന മണ്ണിൽ അരിച്ചുനടക്കുന്ന കുഞ്ഞുപ്രാണികളായിരിക്കും അവരുടെ ലക്ഷ്യം. അവയിലൊന്ന് കൊത്തിയെടുത്ത് എറുകണ്ണിട്ടു നോക്കി, പിന്നെ വരാമെന്ന നാട്യത്തിൽ പറന്നുപോകും. കുറച്ചുകഴിഞ്ഞ് വീണ്ടും എന്റെ അടുത്തേക്ക് ചിറകുവീശി, മോഹിപ്പിക്കുന്ന തരത്തിൽ ഒരിക്കൽക്കൂടി പറന്നെത്തി കൊത്തിത്തിന്നും; പിന്നെ വീണ്ടും പറന്നകലും.

ആ മൂന്നുനാലു മണിക്കൂർ അവരുമായി മുറ്റത്തെ പച്ചപ്പരപ്പിൽ ഞാൻ ഏറെ നേരം അലയും. പിന്നീട് അവയെ കുറച്ചുനേരം ഒറ്റയ്ക്കാക്കി കുളിക്കാനും ഭക്ഷണം കഴിക്കാനുമായി ഞാൻ അകത്തേക്കു പോകും. എനിക്കവരിൽനിന്നു പിരിയാൻ ഒട്ടും ഇഷ്ടമല്ല; പക്ഷേ എനിക്കും വിശപ്പുണ്ടെന്ന കാര്യം ആ പാവം പറവകൾക്ക് അറിയില്ലല്ലോ. എങ്കിലും അവ ജനലുകൾക്കിടയിലൂടെ എന്നെ ഒളിഞ്ഞുനോക്കും. “എന്തേ കൂട്ടുകാരീ, നിനക്കെന്തിത്ര താമസം?” എന്ന ചോദ്യം അവരുടെ കണ്ണുകളിൽ തെളിയുന്നതായി എനിക്കു തോന്നും. കാരണം, ഞാനവയ്ക്ക് പ്രിയപ്പെട്ടവളാണ്.

കുളിയും തേവാരവും കഴിഞ്ഞു പുറത്തേക്കിറങ്ങിയാൽ വീണ്ടും വടവൃക്ഷത്തിന്റെ ചുവട്ടുതന്നെയാണ് എന്റെ ഇരിപ്പിടം. കഴിഞ്ഞുപോയ ഓർമ്മകളെ താലോലിക്കാനും സ്വപ്നങ്ങളെ കൂട്ടുപിടിച്ച് എന്റെ സ്വപ്നലോകത്ത് ഒരു മണിമാളിക പണിയാനും അവിടുത്തെ സ്വപ്നറാണിയായി വിലസാനും എനിക്ക് അവസരമുണ്ട്. കാറ്റിനോടും കിളികളോടും കഥകൾ പറഞ്ഞ്, അവയുടെ ദുഃഖം എന്റെ ദുഃഖമാക്കി മാറ്റാനുള്ള വ്യഗ്രതയും എനിക്കുണ്ട്. അവയിൽ ഞാനലിഞ്ഞ് ഞാൻ അല്ലാതെയാകാനുള്ളതാണ് എന്റെ ഏറ്റവും വലിയ മോഹം.

ചിലപ്പോഴൊക്കെ എനിക്കു തോന്നും—ഇവയ്ക്കും എന്നോട് പങ്കുവെക്കാൻ പലതുമില്ലേ? അവയും ചിലപ്പോൾ ഭാവിയെക്കുറിച്ച് സ്വപ്നങ്ങൾ മെനയുകയാവാം. അവയുടെ ഇടയ്ക്കിടെയുള്ള മൗനവും എന്തൊക്കെയോ ചിന്തിച്ചുറച്ചതുപോലെയുള്ള, ദുഃഖം സൂചിപ്പിക്കുന്ന എന്റെ നേരെയുള്ള നോട്ടവും എന്നെ അസ്വസ്ഥയാക്കും. അവയ്ക്കും അറിയുമോ ആവോ, ഇതെല്ലാം വെറും നൈമിഷിക നിമിഷങ്ങൾ മാത്രമാണെന്ന്? ചിലപ്പോൾ ഒരു വൻകാറ്റോ വേട്ടക്കാരന്റെ ഉന്നം തെറ്റാത്ത അമ്പോ മാത്രം മതി—അതുവരെ ഈ വൃക്ഷത്തിന്റെ താളത്തിനൊപ്പം വെയിലും കാറ്റുമേറ്റു കഴിഞ്ഞിരുന്ന ഈ ശിഷ്ടജീവിതം തകർന്നു തരിപ്പണമാകാൻ. അതുവരെ—ഇതാ, നീയും ഞാനും ഒരുമിച്ചുള്ള ഈ സ്വൽപസമയം—എന്ന് അവയുടെ മുഖഭാവം വിളിച്ചുപറയുന്നില്ലേ?

വസന്തകാലവും കഴിയാറായി. വീണ്ടും ശിശിരമെന്ന അവളുടെ കാമുകൻ വരവാകും. അപ്പോൾ എന്റെ തണൽവൃക്ഷം മന്ദഹാസം തൂകി ഇലകൾ പൊഴിച്ച്, നാണം ചാർത്തി, തന്റെ കാമുകനെ പ്രതീക്ഷിച്ചു കാത്തുനിൽക്കുകയാവും. അതുവരെ പരിശുദ്ധിയുടെ പ്രതീകമായ തൂവെള്ള മഞ്ഞുപുതപ്പ് അണിഞ്ഞ്, വീണ്ടും പിരിഞ്ഞുപോയതിന്റെ ദുഃഖം തെല്ലും അറിയിക്കാതെ, അവൻ അവളെ ഗാഢമായി മൂടും. ഇളംതെന്നൽ പോലും നാണംകൊണ്ട് കുറച്ചുനേരത്തേക്ക് അവിടെനിന്നു വിടപറയും. സ്നേഹക്കിളികളും അവരുടെ പ്രണയത്തിനു തടസ്സമാകാതെ വിദൂരതയിലേക്കു പറന്നകലും; ശേഷിച്ചവ മരപ്പൊത്തുകളിൽ അഭയം തേടും. എല്ലാവരാലും വിട്ടകന്ന ഞാൻ ഖേദമെല്ലാം മറച്ച് എന്റെ കിടക്കയിലേക്ക് മുഖംചേർക്കും—വരാനിരിക്കുന്ന അടുത്ത വസന്തകാലത്തെ മനസ്സിൽ വീണ്ടും ധ്യാനിച്ചുകൊണ്ട്.

അഭിപ്രായങ്ങള്‍

ഈ ബ്ലോഗിൽ നിന്നുള്ള ജനപ്രിയ പോസ്റ്റുകള്‍‌

നാടന്‍ പെണ്ണ്

 മലയാളി മങ്കയുടെ  അമേരിക്കൻ അവതാരം  കാച്ചിയ എണ്ണ തേച്ച് കുളിച്ച്, മുടി ചീകി അറ്റം കെട്ടിവെച്ച്, തുളസിക്കതിർ ചൂടി ജോലിക്കു പോയി വരുന്ന ഒരു നാടൻ പെണ്ണായിരുന്നു എന്റെ സ്വപ്നങ്ങളിൽ നിറഞ്ഞുനിന്നിരുന്നത്. ഇനി അതുമല്ലെങ്കിൽ, വൈകുന്നേരം ജോലി കഴിഞ്ഞ് ക്ഷീണിതനായി വരുന്ന കണവന് കാപ്പിയും പലഹാരവുമായി കാത്തിരിക്കുന്ന സ്നേഹസമ്പന്നയായ ഒരു ഭാര്യ! അതിൽക്കൂടുതൽ ഒന്നും അന്നെനിക്ക് ചിന്തിക്കാനേ കഴിഞ്ഞിരുന്നില്ല. പക്ഷേ, അന്ന് എന്റെ വിധി എന്റെ ജീവിതം പാടേ മാറ്റിമറിച്ചു. എനിക്ക് അനുകൂലമായിരുന്നില്ല ഒന്നും. അമേരിക്കയിലേക്കുള്ള പറിച്ചുനടൽ... ഞാൻ ജീവിച്ചുവന്ന ജീവിതരീതിയിൽനിന്നും തികച്ചും വ്യത്യസ്തമായ ചുറ്റുപാടുകൾ! എന്നിരുന്നാലും, കുഞ്ഞുനാളിൽ കേരളത്തിനു പുറത്തുനിന്ന് നേടിയ വിദ്യാഭ്യാസം അമേരിക്കയിലെ പിന്നീടുള്ള ജീവിതരീതികളുമായി പൊരുത്തപ്പെടാൻ എന്നെ കുറച്ചൊക്കെ സഹായിച്ചുവെന്നു പറയാം. അന്ന് പഠനകാലത്ത്, ദൂരെയുള്ള സർവകലാശാലയിൽനിന്ന് നീണ്ട അവധിക്കായി കേരളത്തിലെത്തുമ്പോൾ, പട്ടണത്തിൽ താമസിക്കുന്ന ജാഡക്കാരിയായ സാലി മാത്യു വീണ്ടും പാവാടയും ബ്ലൗസുമിട്ട് തൊടിയിലൂടെ ചാടിമറിഞ്ഞു നടക്കുന്ന അമ്മപ്പൊ...

പ്രകൃതിയിലെ വിരുതന്‍ പെരുന്തച്ചന്‍

അനിമൽ എഞ്ചിനിയർ-- ബീവെർസ് കണ്ടാല്‍എലിയപോലെഎങ്കിലോ ,കഴിവിൽ  മികച്ചവൻ  ആരാണിവന്‍ എന്നല്ലേ യിപ്പോൾ ചിന്തിക്കുന്നത് ?എങ്കിൽ  സംശയം വേണ്ട ഇവന്‍ തന്നെ  കരണ്ട്തി ന്നു ജീവിക്കുന്ന ജീവികളില്‍ ഏറ്റവും വലിയവന്‍ ,മിടുക്കൻ, ബുദ്ധി ശാലി വടക്കേ   അമേരിക്കയിലെ ബീവറുകള്‍ (beaver).- പ്രകൃതിയിലെ മൃഗ എന്‍ജിനീയര്‍ കാനഡയുടെ ദേശീയ മൃഗം. ആള് ചില്ലറ കാരനൊന്നുമല്ല  എന്നിപ്പോൾ തോന്നുന്നില്ലേ  ? പുഴകളിൽ ,അണകെട്ടി അതില്‍   സുഖമായി കഴിയാൻവീടുണ്ടാക്കി ജീവിക്കുന്ന ഒരുതരം നീർനായ അല്ലെങ്കിൽ ജലത്തിൽ ജീവിക്കുന്ന അണ്ണാനെ പോലെ തോന്നിപ്പിക്കുന്ന   ബീവറുക ൾ  .ആണ്‍ പെണ്‍ ബീവറുകൾ   ക്കണ്ട് മുട്ടി   സ ഖ്യത സ്ഥാപിച്ചു കഴിഞ്ഞാല്‍ പിന്നെ അവര്‍ വീടുണ്ടാക്കേണ്ട  ചിന്തയിലേക്ക് കടക്കും അതിനു മുന്നോടിയായി  മ രത്തടികളും  മണ്ണും ചുള്ളിക്കമ്പുകളും ശേഖ രിക്കാനുള്ള ശ്രമം  തുടങ്ങും  ..സ്വയം അണക്കെട്ടുണ്ടാക്കിയതിനു ശേഷം അതില്‍ വീടു പണിയുന്ന ജീവി വിഭാഗമാണ് ബീവറുകള്‍ . അണക്കെട്ട് പണിയുമ്പോള്‍ വെള്ളത്തിന്റെ നിരപ്പ് ഉയര്‍ന്ന് ഒഴുക്കുകുറഞ്ഞ ഭാഗം തിരഞ...

അടുക്കളയിലെ വജ്രം ട്രഫിൾ

  TRUFFLE disambiguation) ഈ കൈകുമ്പിളിൽ കോരിയെടുത്തതു കൂർക്ക യല്ല പിന്നെയോ സ്വര്‍ണത്തെ പോലെ അല്ലെങ്കില്‍  തങ്കത്തെ പോലെ ത്തന്നെ വില യുള്ളതും  മണ്ണില്‍ നിന്നും കുഴിചെടുക്കുന്നതും ആയ ഫഗൽ  വർഗ്ഗത്തിൽ പെട്ട  അടുക്കളയിലെ വജ്രം എന്ന് വിളിക്കുന്ന  ട്രഫിൾ ??ലക്ഷങ്ങൾ വിലപിടിപ്പുള്ളലോകത്തിലെ  ഏറ്റവും വലിയ ഭക്ഷണ സാധനം മൊട്ടകൂണുപോലെ ധാരാളം സുഷിരങ്ങളുള്ള   ,വേരുക ളോ തണ്ട് കളോ ഇവയ്ക്കുണ്ടാവാറില്ലകണ്ടാൽ ഒരു ചെറിയ ടെന്നീസ് ബോളിന്റെ വലിപ്പവും കറുത്തതും ഇളം മഞ്ഞ നിറത്തോടും കൂടിയാണിവ കാണപ്പെടുന്നത്  ,മണ്ണിനോട് ചേര്‍ന്ന് ആറു  ഇഞ്ച് താഴ്ചയില്‍   ഇടതൂര്‍ന്നു നില്‍ക്കുന്ന മരങ്ങളുടെ വേരുകളുടെ  ഇടയിലിവ  വളരാൻ ഇഷ്ടപെടുന്നുഇറ്റലി സ്പെയിൻ ഫ്രാൻസ് എന്നി സ്ഥലങ്ങളിലുള്ള ആളുകൾ ഈ വേട്ടകളിൽ തല്പരരാണ്‌     ഘ്രാണ ശക്തിയുള്ള   പരിശീലനം നേടിയ പട്ടികളെയും പന്നികളെയും    ട്രാഫിൽ വേട്ട നടത്തുന്തിന് ഉപയോഗിക്കാറുള്ളത്  വളരെ   സൂക്ഷിച്ചു  പട്ടികളും പന്നികളും അവയെ മാന്തി  കി...